(( ذلتني عيونها )) رواية حب كوييتيه ..>> روعه

(( ذلتني عيونها )) رواية حب كوييتيه ..>> روعه

هالقصه عجبتني شخصيا" واتمنى تعجبكم انتوؤوؤو بعـــد...

هذا أول جزء و بنطر ردودكم عشآآآن انزل الجزء الثـــاني...

( صوت انثوي مبحوح ): ههه والله وكبرت يابدر

بدر ( اللي كان حاط موبايله على اذونه قعد يتلفت بذهول صوب بحر شرق جدام(قدام) الطراريد اللي كانت مصفوفه بشكل مرتب و ضوء الشبات كان يشق البحر...و وراه ستار ب** شرق اللي كان خارجي يطل ع البحر بإختصار المنظر كان يسحر...):منو انتي؟

.......: افا يابدر افا ماعرفتني؟؟ لالا تزعلني منك جذي ( بدلع ساحر و رقه مو طبيعيه)

بدر( بلا مبالاه مصطنعه): بتقولين ولا لأ

.............:ههههه آسفه بدر شكلك حمقت (عصبت) تنرفزت صح ههههه خلاص خلاص..اظن الوقت مو مناسب الحبيب مختلي بروحه صوب البحر رومانسي حبيبي.ههههه..لا بس تي شيرتك عجبني...ممم تغيرت يابدر..

بدر: نوعج جذي يعني..شكلج متأثره بالافلام والله..اقول لاتدقين مره ثانيه عشان لاتحطين نفسج بمواقف انتي مو قدها

.............:ههههههه احب هالمواقف انا..دامها منك..عسل على قلبي...شفت العسل؟..جذي جذي على قلبي..ومستعده اتعرضلها كلها ...دير بالك على روحك بدر هاذا انا و وصيتك باي حبيبي

[تم الفصل..]

قعد بدر يطالع الرقم !!..(منو هاذي شهالرقله اللي قاطه روحها بهالطريقه..يمعود انت ليش مهتم وايد... باللعنه تلعنها تلقاها وحده من هالبنات الخفاف تبي تتعرف ولا تقزر...(تقضي وقتها)..ختولي ززززين اتركها عنك ززين <<بدر يكلم روحه...)

راح صوب ستارب**..طلب كاراميل ماكياتو ميديام..واختار طاوله بعيده عن ازعاج الناس و قعد ودخن زقاره...شوي و يرن موبايله ...نفس الرقم!!!

.......: تؤ تؤ تؤ تؤ بتزعلني منك يابدر...كل شي فيك تغير للأحسن..الا هالعاده..متى بتبطل تدخين يعني!!!

بدر: اقول انتي..... طفارة امي هالحركات(طفارتي) تسدينه ولا شلون

........:شلون

بدر: اقول لو انتي بنت ناس جان ماتدقين على الشباب و تقطين روحج عليهم استحي على ويهج و سديه

تم الفصل....

سدته واهيا تتوعد فيه....( انا تقولي هالحجي يابدر...انا لك يابديرررر اوريك هين....والله لك...[سكتت شوي و قالت].وانته لي بعد )..

بدر شاب كويتي 21 سنه من اسره معروفه بمراكزها المرموقه اغلب خواله دكاتره محتلين جامعة الكويت..يعني مرتقين علميا اكثر من ما اهما مرتقين ماديا..مستواهم المادي مريح...لأ مو مريح..اكثر بشوي...

يعني مستواهم راقي..ساكن بالروضه (احدى مناطق الكويت)....يدرس في كلية العلوم الاداريه (تجاره)..وكان عاشق للكره...ولاعب مميز بنادي السالميه...

سبورتي هالريال ومايهمونه البنات ...بالنسبه للشكل..طويل مجسم اسمر سمار شباب الكويت ( حنطاووووي)..

س**وكه خفيفه واحلى مافيه خفة دمه وتكانه بشكل مو طبيعي مايعطي ويه (( ثقيل يعني)..وحبيب امه...تحبه حيل...وعنده خواته ( ساره...متزوجه مشاري وعندها منه جوري 5 سنوات و همس سنتين)...

واخته الثانيه (دانه...16 سنه..اولى ثنوي)..

قام بدر بعد ماطفى الزقاره ودخل شرق من داخل...مايحتاج اوصف شرق...كان زحمه ..طبعا" زحمه...اليوم خميس و الناس تارسين شرق...شوي و يرن تليفونه..

بدر:اذتني هالرقله والله لوريها...

شاف الرقم ولا خالد رفيجه..

بدر: هلا بو وليد الله يابك يالحبيب توني افكر ادق عليك

خالد( نوعية راعي بنات و فاهم البنات عدل ماينقص عليه مايعترف بالحب لأن اللي حبها الله خذاها في حادث مروع قبل 3 سنين.. وامقضي حياته بهالطريقه ديوانيه و قعدة شباب و مغازل بنات ...يبي ينساها مو قادر ...وده يكون مخلص لها بس معتقد ان هالطريقه ممكن تنسيه حبه اللي مات بس للأسف ولا وحده من البنات قدرت تنسيه قلبه و روحه و نبضه ..غدير...اللي ماتت بالواقع لكنها عمرها ماماتت بقلبه و عقله و احلامه و طموحه كان عايش على بقايا ذكراها وهاذا اللي امصبره...غشمرجي و راعي نكته بس مايقدر يخفي الحزن اللي باين بعيونه و واضح و وضوح الشمس.......): هلااا بو نويصر عسى ماشر يبه ؟؟؟ تبيني امرك ..انت وين بس

بدر: لابو وليد انا بشرق ...وينك انت الحين

خالد:وين بكون يعني ....بالدوانيه مع الربع

بدر:لا ابيك بروحك مالي خلقهم والله

خالد:لا شكله الموضوع جااايد (قوي) خلاص خلاص وين تبيني ايييك

بدر: خلاص امرك آخذك من الدوانيه

خالد:صار بو ناصر ناطرك ابوووي (امووووواح)..

بدر:ههههههههه يلا ياي

خالد :لاتبطي ( لاتتأخر)

بدر:صرتلي امي انت الثاني..يايك يايك...

سكر خالد التليفون و اهوا يجيك على مسج واصله طلع من الوطنيه اللي يهداهم زلغوووني ( لمعرفة اخبار المباريات النهائيه ارسل على 1515 ....إلخ)..

كان لاهي بالموبايل مو معطي اهميه حق البنت اللي يايتله من بعيد صوب مخرج بوابة شرق...ودعمته بطريقة غريبه و مقصوده...

............:آسفه اخوي
بدر:لا انا اللي آسف حسبي الله على المسج خلاني ادوعم

.......(البنت ابتسمت ابتسامه خفيفه وابتعدت) ...

بعد اقل من 10 خطوات وصل مسج ثاني لبدر...
(((( عــطــرك بــعــده مــاتغـــــير..)))

لف ويهه بسرعه بيلحق على البنت ..اي..اهي نفسها..اهي نفسها صاحبة هالصوت و هالمسج..اهي نفسها...
الي لفت ويهها و ابتسمت و كملت خطواتها بالزحمه و دخلت دبنهامز...

وعارفين دبنهامز شرق بالدور الارضي ...كانت اذكى منه وصعدت الدري اللي بالمحل للدور الأول...ومن اهناااك نزلت مره ثانيه و طلعت من البوابه الثانيه اللي صوب مركز السلطاان ( سوبر ماركت لازق بشرق)....

بدر كان واقف جدام مانجو الغبي..مادرى ان البنت طلعت من شرق كله ...دخل مانجوو وسأل اللي بالمحل كانوا اكثر من وااحد بما ان دبنهامزز كبيررر حيل ومكون من اركان مختلفه..

بدر: لو سمحت ....في بنت دخلت عندكم لابسه اسود

الريال: اخي البنت صعدت لفوووء ( فوووق.) بتأدر تطلع له ( تقدر تصعد لها)..

بدر: مشكور..

وبحركه سريعه صعد فوووق..وشاف ان المحل مفتوح من فوق..شي طبيعي تكون طلعت البنت
بدر...( والله انك غبي...أثبت انك غبي هالمره..بس تعال!!..انت ليش مهتم وايد...ومن متى تهمك بنت؟؟..بس الفضول ذابحني...بعرف شتبي مني...معقوله تكون تحبني...لأا يبه شكلها من النوع الدايخ ..اللي كل يوم واحد....ختولي اتركها زين.....)

طلع بدر من شرق وركب سيارته ( رنج روفر سبورت لونه ابيض..)

وحط اغنية عبدالمجيد معقوله .....((( معقوله كلمه تغير حالي معاك...تشكك بي..وبغلاك..وانت الروح في قلبي و وريده..تقول احنا خلاص..الكل منه له طريقه......)))

كمل طريجه لي دوانية الربع اللي كانت بكيفان...
صفط بدر ودق على خالد..
بدر: بو وليد انا عند الباب
خالد:يلا كاني طالع لك....

بعد دقايق طلعله خالد و ركب معاه بالسياره...

شنو الموضوع اللي كان شاغل بدر و يبي خالد يعاونه فيه....؟؟؟

خالد: تحجى ياخوي شصاير معاك

بدر:والله ياخويلد حاس بالذنب ياخوك

خالد:بليييييييييييييييه ردينا على نفس السالفه

بدر:عمري مانسيتها..
.
خالد:وشلي يريحك ( شنو يريحك)؟؟

بدر:ضروري نبلغ

خالد:انت مينوووون ..اول واحد بياكلها انت تدري ولا ماتدري؟

بدر:ادري ياخالد ..انسجن بس انام مرتاح

خالد:ياعمي فكني زين شنو انام مرتاح اذا انت تبي تنسجن انا ما ابي انسجن ولا تنسى انا راح تربطني معاك واروح جفي

بدر: صدقني ياخالد الأحسن انه نبلغ..

خالد:لا تحاول تقنعني يابدر لأنك ماراح تقدر..مو مستعد اخسر عمري و اهلي عشان حضرتك تنام مرتاح

بدر:احنا غلطنا

خالد:الغلط راكبنا من راسنا لي ساسنا...بس انت اعلم بالحال الحين..انا تبت لربك..وماراح اسمحلك تخرب حياتي اليديده

بدر: اي حياة اللي تتحجى عنها..مرتاح بللي قاعد تسويه ولا مرتاح؟..حياة اقرب للفساد...شنو تبت لربي وانت كل يوم لك وحده

خالد:عن الغلط يابدر مو لأنك رفيجي وعارف بأسراري تقعد تستفزني و تهيني بهالطريقه...انا معاك ان في جانب خايس من حياتي..لكن صدقني قاعد احاول كثر ما اقدر وانت بتحكم علي بالفشل بتفكيرك هاذا

بدر: ياخالد ادري ان الموضوع صار غصبن علينا احنا الاثنين وادري محد راح يصدق ان احنا مالنا شغل بالموضوع..بس ننظلم ولا نسكت عن الظلم...

خالد:انت شايف جذي...

بدر: اي نعم..مو قادر انام ياخالد..في روح ماتت كل يوم قاعده تطريلي بالاحلام..تبيني اساعدها..ع الاقل انتقم لها وصدقني الله فوق و عارف ان مالنا يد بالموضوع

خالد: والاهل والناس؟؟؟

بدر: الاهل بيعذرونك انت ولدهم...والناس ياخالد..شلي يسكت الناس..الناس لي حجت ماتسكت..وتطري الشين قبل الزين..وتتحجى عنك حتى وانت مو امسوي شي..واذا احنا بنعيش ونرضي خاطر كل واحد ..حياتنا راح تصير مو لنا

خالد: بس يابدر احنا عايشين بينهم

بدر: بس ربك كبير..وربك فوقك..وفوقهم كلهم.....

عن شنو قاعد يتكلم بدر؟؟؟وليش خالد مو اموافقه بولا راي..؟؟..واي روح هاذي اللي ماتت وتبي بدر ينتقم لها.؟؟...

رد بدر بيتهم بعد مارد خالد للدوانيه..واكيد حديثهم ما انتهى ...دقت ام بدر على ولدها وقالتله ابيك و ضروري وهالشي اللي خلاه يقطع حديثه مع خالد و يأجله ....

وصل بدر بيتهم و لقى سياره سافطه صوب بيتهم.....وقف صوبها فتره ...(( منوو بيكون زايرنا اليوم يعني...هاذا مورانو مناير بنت عمي..اكيد يايه مع امها و اختها...زين انا شكو امناديني يعني؟؟؟؟...خل ادخل زين و اشوف شصاير ..صج حريم.....))

دخل بدر واهو امنزل راسه كالعاده جدام اي مره حياوي بطبعه مايحب يقط فيسه وايد ...ومحترم بشكل مو طبيعي..طبعا"..دامه تربية ام بدر المثقفه الوكيله ..اللي تركت المدرسه عشان تجابل عيالها لين شافتهم يكبرون جدامها بعمرهم و بأخلاقهم و بإنجازاتهم...:: السلام عليكم

ام فيصل( ام مناير و نوره و زوجة عمه مبارك...): وعليكم السلام هلا وليدي عسى ماشر قاطعنا ماقمنا نشوفك ولا قمت تمرنا

بدر: بهاذي معاج حق انا امقصر و ستين امقصر بس صدقيني مشاغل الدنيا...

نوره: شلونك بدر...( بإبتسامه)

نوره [ بنت عم بدر و عمرها 17 سنه خريجه بآخر سنه لها كانت تموت ببدر و بشخصيته كونها مراهقه وشافت فيه الجمال و الاخلاق و السنع ..كانت تموت فيه و تعشقه و هالشي باين بعيوووونها...]

بدر: هلا نوره بخيرر..انتو شلونكم بنات

مناير ( مدرسه لغه انقليزيه مو متزوجه عاديه بالنسبه للشكل..بس كشخه ...وستايلها حيل عجيب...ومعروفه بهالشي بالمدرسه بين المدرسات و الطالبات...و بالعايله بين بنات عمها..وخارج العايله مع رفيجاتها ...كانت تبهر اللي جدامها بذوقها العالي و اسلوبها الذرب........متحجبه. ....بإختصار كانت فتاة احلام كل شاب ...تقدموا لخطبتها 5 شباب رفضتهم كلهم عشان الشهاده كانت تبي واحد مو اقل من جامعي عشان تقدر تعيش معاه ياخي مثقفه البنت و راقيه ماتبي تبتلش مع عسكري ولا جندي ماعنده الثنويه.........): والله بخير عساك بخيرر

دانه(اخته): اهلين يابو ناصر واحنا مانقدر نشوفك الا لي خرعناك

بدر: هلا سحيله ( كلمه كويتيه بمعنى البنت الجيكره اللي الذبان عليها وين ماتروح)...

ام بدر: بدر يمه ام فيصل بغت تشوفك و مره وحده بغيناك بموضوع انا واهي

بدر: تامرون امر ..آمري خالتي

ام فيصل: يمه تعرف احد بوزارة التربيه

بدر: اي خالتي عندي اكثر من واحد اعرفه هناك

ام فيصل: لي بغيناك تنقل اوراق مناير من المدرسه الخايسه اللي فيها لي مدرسه قريبه يم بيتنا تقدر؟؟

بدر: بس القانون اليديد خالتي صعب شوي و انشالله انا بشوفلي واسطه قويه ومايصير خاطرج الا طيب

مناير: تسلم بتسوي فيني معروف لي نقلتني مو قادره اداوم يوم واحد هناك

بدر( امنزل راسه):لا انشالله من عيوني من باجر الصبح بشوف الموضوع بس بغيت اوراقج
مناير: انا يايبتهم معاي تفضل ( وتعطيه فايل متروس اوراق تهمه عشان النقل ويفتحه بدر و يجيك على كل الاوارق)

بدر: كل الاوراق موجوده انشالله مثل ماقلت لكم اشوف الموضوع باجر

نوره: آآ بدر

بدر: هلا نوره

نوره ( كانت تبيه يطالعها بس مارفع راسه كلش...كانت لابسه تنوره ضيجه حيييييييل وقصيره نوعها اللي يبي يسبق عمرها ولبسها دايما اكبر من سنها رافعه شعرها بbuff وكان ستريت نازل لي نص ظهرها): شتعرف عن عايلة البرواز

بدر: واحد من ربعنا والله من هالعايله....خوش واحد..خير ليش تسألين؟؟

نوره:لا بس رفيجتي اخوها حمد اعتقد رفيجك بس حبيت اسأل لأنها قالتلي سألي ولد عمج

بدر: اي حمد هاذا اسمه..صح رفيجي

وتقاطعهم دانه: يلا بدر روح ماشبعت من القعده مع الحريم

بدر استحى و قام و ام بدر تدخلت:انتي يا ام لسان طويل شحار قلبج قاعد مع خواته و ماكو احد غريب بدر اقعد يمه

بدر: لا يمه ماهمتني هالصخله صاعد فوق ببدل وآخذلي حبة بندول راسي شب علي

ام بدر: اسمالله عليك يمه خلاص روح

ام فيصل:ماتشوف شر بو ناصر

بدر: عن اذنكم واول ما اخلص موضوعج مناير اعطيكمم خبر
مناير: خير انشالله
بدر: يلا توصون شي؟
ام فيصل: سلامتك ..

بدر: الله يسلمج...
صعد بدر فوق..وماكان راسه يعوره ..بس استحى من احراجات اخته المليقه ..وبالأصح خاف يحرج البنات معاه والا اهوا مو فارقه حيل معااه....قط روحه ع الفرااااش و تسند وباله كان مشغووول...

شوي ولا ( طوط طوط طوط طوط) صوت المسج.....

بدر: إنــا للـه

فتح المسج..

(((((انا الماضي .. اللي رجع..والمستقبل اللي بتعيشه..
لاتلوم قلبي لو غلط..او تمادى في طيشه
ولو تذكر بقايا الأمس..يمكن تطريلك ونتي..
يمكن لابغيت تحس..يمكن تحس بعلتي...))))

بدر: !!!!!! ....( قام و تربع وهالمره بدا يشده المووضوع..قال لأ ماراح ادق....برد عليها بمسج يمكن تقولي اهي منووو)..

( آسف إذا غلطت بس اي واحد بمكاني بيتنرفز من هالحركــه)

ردت عليه::
( معآك حق في هاذي،، طريقتي كانت غلط..ومسموح وانت ما غلطت)

رد عليها:
( اقدر اعرف الحين منو إنتي؟..)

ردت عليه:
( اكيد لأ....)

رد عليها:
( تبين شي مني؟...قولي خنخلص و افهم انا مع اي نوع قاعد اتعامل..)

ردت عليه:
( مع نوع انت تجهل نوعه..)

رد عليها:
( بدينا بحجي الأفلام....شتبين مني انتي؟؟)

ردت عليه:
( أبـيـك إنـت..)

رد عليها:
( شنو ابيك انت؟؟؟..انتي صاحيه؟؟..)

ردت عليه:
( مينونه فيك )

ضحك بدر بينه وبين نفسه شهالنوع الغبي..

ومارد عليها....مع انه كان محترق بيعرف منووو هالبنت وشتبي....بس مسك اعصابه لأن يدري اسهل طريقه ياخذ فيها اللي يبي برودة الاعصاب واللا مبالاه والحقران.....بس بنفس الوقت قعد ينطر مسج منها...مانام......مشغول باله فيها...مايتذكر من ملامحها شي ..كل اللي صار لمحه مو اكثر...يحاول يجمع شتات الصوره....بنت شعرها نازل على ظهرها ...شاف ظهرها بس ماركز على ملامحها....منو تكون؟؟وشتبي منك يابدر؟؟؟...معقوله اللي قاعد يصير؟؟؟...فلم والله فلم....

قطع افكاره صوت مسج ...وبسرعه فتح المسج....
(( ليش ماقعدت معانا و تدري اني ميته على شوفتك....))

بدر: انا لله هاذي شتبي شلي بلانا بهالمراهقات

رد عليها::
( يوزي يانوره لا اعلم امج ...)

انتظروا الجزء الثاني..>> وابي ردوود عشان اكمل الروايه ...

يسلمووووووووووووووووووووو ملك

يسلمووووووووووووو مع اني واجهت صعوبه بقرائتها عشان اللهجه

بس يعطيكي العافيه

تحححمست كككمل (:

» رواية "جودت بيك و ابناؤه " تتحول الى مسلسل
» صور روعه لبيرين سات
» نقوش حناء روعه .............
» تصاااميم وتواقيع روعه لبيرين
» بيرين سات فى اعلان جديد كتير روعه